Act 2 | NdeIBE | STEP | Kwathi kufika usuku lwePhentekhosti, babendawonye endaweni yinye.

Acts 2

UMoya ONgcwele Uyehla NgePhentekhosti

1 Kwathi kufika usuku lwePhentekhosti, babendawonye endaweni yinye. 2 Masinyane kwabakhona umsindo unjengokuvunguza komoya wesiphepho usehla uvela ezulwini wagcwala indlu yonke ababehlezi kuyo.

3 Babona okwakungathi ngamalangabi omlilo asuka ehlukana ahlala kulowo lalowo wabo.

4 Bonke bagcwaliswa ngoMoya oNgcwele, basebeqalisa ukukhuluma ezinye izindimi njengokuphiwa kwabo amandla nguMoya.

5 Ngalesosikhathi eJerusalema kwakuhlala abaJuda ababemesaba uNkulunkulu bevela kuyo yonke imibuso yomhlaba. 6 Bathi ngokuzwa umsindo lo, kwabuthana ixuku labantu bemangele ngokuba ubani lobani wabezwa bekhuluma ngolimi lwakhe.

7 Badideka babuza bathi, “Kanti amadoda wonke la akhulumayo kabasimaGalile na? 8 Pho kungani omunye lomunye wethu ebezwa ngolimi lwakhe na? 9 AmaPhathiya, lamaMede lama-Elami; izakhamizi zaseMesophothamiya, lezeJudiya, leKhaphadokhiya, loPhontusi le-Asiya, 10 leFirigiya, lePhamfiliya, leGibhithe lezingxenye zeLibhiya eduze leKhurene; izethekeli ezivela eRoma 11 (abaJuda lamakholwa aphendukele enkolweni yesiJuda); amaKhrethe lama-Arabhu – sibezwa befakaza izimangaliso zikaNkulunkulu ngezindimi zethu!”

12 Babedidekile bengelankani, babuzana bathi, “Kutshoni lokhu?”

13 Kodwa abanye benza inhlekisa ngabo bathi, “Banathe iwayini bedlulisa.”

UPhethro Ukhuluma Phakathi Kwexuku Labantu

14 UPhethro wasesima labaLitshumi Lanye, waphakamisa ilizwi lakhe wakhuluma emphakathini wathi: “Bantu bakithi elingamaJuda, lani lonke eliseJerusalema, kahleni ngilicasisele lokhu; lalelani kuhle kulokhu engikutshoyo.

15 Amadoda la kawadakwanga njengoba licabanga. Kuseselihora lesificamunye ekuseni!

16 Hatshi, lokhu yikho okwakhulunywa ngumphrofethi uJoweli ukuthi:

17 ‘Ngezinsuku zokucina, uNkulunkulu uthi, Ngizathululela uMoya wami kubo bonke abantu. Amadodakazi enu azaphrofetha, izinsizwa zenu zizabona imibono, lamaxhegu enu azaphupha amaphupho.

18 Laphezu kwezinceku zami, ezesilisa lezesifazana ngizawuthulula uMoya wami kulezozinsuku, yikho bazaphrofetha.

19 Njalo ngizatshengisa izimanga ezulwini phezulu lezibonakaliso emhlabeni phansi, igazi lomlilo lezikhatha zentuthu.

20 Ilanga lizaphendulwa umnyama lenyanga izakuba njengegazi kungakafiki usuku olukhulu lweNkosi, olukhazimulayo.

21 Kuzakuthi wonke obiza ibizo leNkosi asindiswe.’

22 “Bantu bako-Israyeli, zwanini lokhu: UJesu waseNazaretha wayeyindoda eyamiswa nguNkulunkulu kini ngemimangaliso, langezinkinga lezibonakaliso uNkulunkulu azenzayo phakathi kwenu ngaye, njengoba lina ngokwenu lisazi.

23 Umuntu lo wanikelwa kini ngecebo likaNkulunkulu ayelimisile langolwazi lokuzayo; njalo lina, lincediswa ngabantu ababi, lambulala ngokumbethela esiphambanweni. 24 Kodwa uNkulunkulu wamvusa kwabafileyo, wamephula ebuhlungwini bokufa, ngokuba kwakungenzeki ukuthi ukufa kumcindezele. 25 UDavida wathi ngaye: ‘Ngayibona iNkosi kokuphela phambi kwami. Ngenxa yokuthi ingakwesokunene kwami, angiyikunyikinywa.

26 Ngakho inhliziyo yami iyathaba lolimi lwami luyathokoza; umzimba wami lawo uzahlala uthembile,

27 Ngokuba kawuzukungiyekela ngiye engcwabeni njalo kawuyikuyekela oNgcwele wakho abone ukubola.

28 Ungazisile izindlela zempilo; uzangigcwalisa ngentokozo phambi kwakho.’

29 “Bazalwane, ngiyalitshela ngilesibindi ukuthi ukhokho uDavida wafa wambelwa, njalo ithuna lakhe likhona khonapha kuze kube lamuhla. 30 Kodwa wayengumphrofethi, ekwazi ukuthi uNkulunkulu wayemthembisile ngesifungo ukuthi wayezabeka omunye wesizukulwane sakhe esihlalweni sakhe sobukhosi. 31 Ngoba ebona okwakungaphambili, wakhuluma ngokuvuka kukaKhristu, ukuthi kazange atshiywe engcwabeni, njalo umzimba wakhe kawukubonanga ukubola. 32 UNkulunkulu usemvusile uJesu lo waphila, thina sonke singofakazi balokho. 33 Manje ngoba esekhutshulelwe ngakwesokunene sikaNkulunkulu, usamukele kuYise uMoya oNgcwele owathenjiswayo wasekuthulula lokho elikubonayo lelikuzwayo manje. 34 Phela uDavida kakhuphukanga ukuya ezulwini, ikanti wathi, “ ‘INkosi yathi eNkosini yami: “Hlala ngakwesokunene kwami

35 ngize ngenze izitha zakho zibe yisinyathelo sezinyawo zakho.” ’

36 Ngakho-ke akuthi u-Israyeli wonke aqiniseke ngalokhu: uNkulunkulu usenze uJesu lo, elambethelayo, ukuba yiNkosi loKhristu.”

37 Abantu bathi bekuzwa lokhu batshayeka kakhulu ezinhliziyweni, bathi kuPhethro labanye abaphostoli, “Bazalwane, sizakwenzenjani na?”

38 UPhethro waphendula wathi, “Phendukani libhaphathizwe lonke, ebizweni likaJesu Khristu ukuze lithethelelwe izono zenu. Lani lizakwamukela isipho soMoya oNgcwele.

39 Isithembiso ngesenu labantwabenu njalo ngesabo bonke abakude – esabo bonke iNkosi uNkulunkulu wethu ezababiza.”

40 Wabaxwayisa langamanye amazwi amanengi; njalo wabancenga wathi, “Zisindiseni lina kulesi isizukulwane esonakeleyo.” 41 Labo abalemukelayo ilizwi lakhe babhaphathizwa, kwengezwa enanini labo mhlalokho abangaba yizinkulungwane ezintathu.

Ubudlelwano Bamakholwa

42 Bayikhuthalela imfundiso yabaphostoli kanye lobudlelwano, lokuhlephula isinkwa lokukhuleka. 43 Wonke umuntu wagcwala ukuthithibala, njalo abaphostoli benza izimanga lezibonakaliso ezinengi. 44 Wonke amakholwa ayendawonye, ehlanganyela kukho konke.

45 Bathengisa izinto zabo lezimpahla zabo banika loba ngubani oswelayo.

46 Izinsuku zonke baqhubeka behlangana emagumeni ethempeli, njalo behlephula isinkwa emakhaya abo besidla ndawonye ngezinhliziyo ezimhlophe, eziqinisekileyo,

47 bedumisa uNkulunkulu njalo bethakazelelwa ngabantu bonke. Njalo iNkosi yengeza inani labo izinsuku zonke ngalabo abase besindisiwe.